Əmlak Məsələləri Dövlət Komitəsi əsasnaməsi ilə müəyyən edilmiş vəzifə və funksiyaların icrası, o cümlədən daşınmaz əmlaka dair hüquqların dövlət qeydiyyatına alınması, daşınmaz əmlakın dövlət reyestrinin aparılması və vahid kadastrın tərtib edilməsi sahələrində işlərin daha da təkmilləşdirilməsi və səmərələliyin artırılması istiqamətində ardıcıl tədbirləri davam etdirir. Bu sahədə komitə bir sıra beynəlxalq qurumlarla qarşılıqlı əməkdaşlıq çərçivəsində inkişaf etmiş ölkələrin təcrübələrinin öyrənilməsi və təcrübə mübadiləsinin həyata keçirilməsi məqsədi ilə ayrı-ayrı mövzularda seminar və treninqlər, habelə işgüzar səfərlərin keçirilməsinə xüsusi önəm verilir.

Məlum olduğu kimi, Azərbaycanda daşınmaz əmlak üzərində hüquqların dövlət qeydiyyatı prosesinin daha da təkmilləşdirilməsi, bu sahədə beynəlxalq təcrübənin tətbiqi məqsədi ilə Dünya Bankının “Daşınmaz Əmlakın Qeydiyyatı Layihəsi” həyata keçirilir. Azərbaycan Respublikasının Prezidentinin Əmlak Məsələləri Dövlət Komitəsinin yaradılması ilə bağlı 19 may 2009-cu il tarixli Sərəncamından sonra layihənin reallaşması üzrə müxtəlif istiqamətlərdə işlər daha da sürətlənib.

Əmlak Məsələləri Dövlət Komitəsində 2010-cu ilin birinci yarısında Azərbaycan Respublikası Prezidentinin fərman və sərəncamları ilə verilmiş tapşırıqlara əsasən, dövlət əmlakının idarə edilməsi, qorunub saxlanılması, ondan səmərəli istifadə edilməsi, dövlət mülkiyyətinin özəlləşdirilməsi, icarəyə verilməsi, daşınmaz əmlak üzərində hüquqların qeydiyyatı, daşınmaz əmlakın kadastrının aparılması istiqamətlərində qanunvericilikdə nəzərdə tutulmuş tədbirlərə dair iclas  keçirilmişdir.